سيد حجاب .. كلمات الوسية كاملة !

مين اللى قال الدنيا دى وسيّه؟

فيها عبيد مناكيد وفيها السيد

سوّانا ربّ الناس سواسيه

لاحدّ فينا يزيد ولايخسّ إيد

جينا الحياة زىّ الندى أبرياء

لارضعنا كدب ولا اتفطمنا برياء

طب ليه رمانا السيف على الزيف؟

وكبف نواجهه غير بالصدق والكبرياء

عيش يابن آدم بِكْر .. زىّ الشجر

موت وإنت واقف زيّه, مطرحك

ولاتنحنى لمخلوق, بشر أو حجر

وشِدّ فوق مهما الزمان جرّحك

2-

وتستمر الحياة

بين ابتسامه وآه

فيها اللى تاه فى دجاه

واللى ضميره هداه

وكل ضيقة بعدها وِسعه

وآهى دى الحقيقه بس منسيّه

وكلنا ولاد تسعه وبنسعى

ودى مش وسيّه, الناس سواسيّه

لملم جروحك ياحزين وامشى

خطوه كمان وتخف آلامك

واحلم بعين صاحيه ولا تنامشى

غير لما تقطف زهر أحلامك

3-

الفرق بيننا وبين ولاد المدينه

همّا ولادها واحنا غُرب فى دروبها

الجوع قصادنا, الخوف مكلبش إيدينا

والخوف يذلّ النفس ويزيد كروبها

ياقوّة الله حِلّى فى عروقى حِلّى

خلّينى أتبّت فيكى وأثبت محلّى

وحِلّى عنّى يارعشة الرعب حِلّى

لأجل إنى أصدّ الجوع إذا جِه و حلِّ

4-

ورجعنا تانى نعانى نفس الأسيّه

هيّاها , مافرقتش فى أى حاجه

وكأنى بهرب من وسيّه لوسيّه

بس الخواجه هنا ماهوّاش خواجه

نفس الوسيّه فى كلّ حتّه ورانا

مطرح مانهرب نلقى نفس العتامه

ممرمَرانا, فى رجلها مجرجَرانا

وكأن ده المكتوب ليوم القيامه

5-

يافرحتى البكريه وماكانش يومك

ليه موتتى ؟ ليه بتفرفرى من بين إيديا؟

ورجعنا تانى يادنيا نمضغ همومك

آه يا احنا ي امقاتيل ومالناش ديّه

الفقر كافر!

أيوه والظلم كافر

طاغوته فارد على البيوت طيلسانه

لحدّ إمتى ياليل هنفضل نعافر؟

والحقّ سافر ..

بس مقطوع لسانه !

6-

دنيا جديده تنفتح وبتاخدنى

بافتح لها عينى وقلبى وروحى

وأفتح لها دراعينى آخدها فى حضنى

ألاقى حزنى داب وطابت جروحى

دنيا جديده تنفتح لى دروبها

بالاقى نفسى فيها وأحضن خيالى

هامدّ خُطَوى من شروقها لغروبها

وإن ليّلّت؟ أحلامى شمس الليالى

7-

دنيا جديده بتنفتح وبتاخدنا

نفتح لها الأحضان ونجرى عليها

هنا آخرة الحزن وبداية وجودنا

سما مفتوحه لنا

لابد نوصل عاليها

8-

أيوه يادنيا حنّى واتبسّمى لى

بعد الضلام الفجر طالع يلالى

آه يانسايم الجنّه على قلبى ميلى

شيلى جناحاتى لفوق..لفوق.. لفوق

لفوق للعلالى

9-

لابد ترجع مصر حرة وأبية

ومش وسية للخواجه وديوله

ولابد تتدى خيرها لابو جلابية

وابو بدلة زرقا اللى انحنى من حموله

10-

أبكى يا ريح ونوحى وضوحينا

غربة فى بلادنا اتحكموا الغرب فينا

لحد امتى يا دنيا هتسوحينا

ندا روحنا الدفينة

11-

آه يا زمن معيوب يا أيام سفيهة

يا دنيا مقلوبة عاليها فى واطيها

بقى يسرقونا ويتهمونا احنا فيها

وغافيرها حراميها وكبيرها خاطيها

الاغراب بياكلوا لحمنا ويحرمونا

وبيشربوا من سيل عرقنا ودمانا

نهوى بكرباج يهوى بيقومنا

وازاى نقوم وهمومنا دى مكومانا

12-

فارس وخيال والحياة بتاندينى

والحلوة من شباكها طلت سعيدة

وطرف عينها بالهوى بيبادينى

بس انا قلبى وياه عالية البعيدة

13-

منتش وسية احنا زهرة شبابك

ولكنا سواسية بندق بابك

عشقين ترابك كحلة العين هواكى

واحنا فداكى وبكرة هنعيد شبابك

14-

والفرحة جاية يا دوب بفتح رموشى

لقتها رايحة وروحى رايحة وراها

يا دنيا ليه ليالكى مبيرحموشى

ولا الشموس ولا فرحتى منوراها

15-

وضحكتلى بعد القسا يا زمانى

قربتلى حلم الطفولة السعيدة

خطة كمان وانول ارق الامانى

عالية البعيدة خلاص مهياش بعيدة

16-

يا نسمة البحر اسرحى وطوحينى

وفى حضنك الطيب خدينى احضنينى

وهدهدينى فى الهوا ومرجحينى

وفرحينى باللى جاى من سنينى

يا بحر موجتك طفلة تضحك وتحبى

وترش وشى ترعش النشوة روحى

هنا الحياة ملكى هنا الفرح صاحبى

شيلينى يا روحى وللبحر روحى

17-

يا هل ترى آن الاوان وابتدينا

ورجعلنا اللى فر من بين ايدينا

آن الاوان وبقينا من تانى احنا

احنا زينة مطارحنا يا احلام خدينا